Во моментов 16 пациенти се лекуваат на Клиниката за инфективни болести поради западнонилска треска, од кои шест се во критична состојба. Надлежните предупредуваат дека инфекцијата не ги засега само повозрасните, бидејќи меѓу хоспитализираните има и 25-годишен пациент.
Директорот на Клиниката за инфективни болести, Фадил Цана, информираше дека шестмината пациенти во критична состојба се постари од 60 години и се лекуваат на Одделот за интензивна нега. Најмладиот пациент со невроинвазивна форма на заболувањето има 25 години и во моментов е во стабилна состојба.
Според Цана, невроинвазивната форма ја развиваат околу еден процент од инфицираните. Кај овие пациенти меѓу првите симптоми се висока температура, силна главоболка, закочен врат, дезориентираност и конфузност.
Министерот за здравство, Сашо Клековски, информираше дека сите инфективни одделенија, матичните лекари и здравствените работници кои би можеле да дојдат во контакт со заболени се известени за состојбата.
Клековски нагласи дека при епидемиолошкото следење мора да се разликува местото на живеење од местото каде што пациентот најверојатно бил заразен. Инкубацијата на вирусот трае од три до 14 дена, поради што кај секој пациент се прави епидемиолошка анкета и се проверува каде се движел и дали престојувал надвор од местото на живеење.
„Една од мерките е лична заштита од убоди од комарци и отстранување на застоена вода во дворови или во непосредната околина“, посочи Клековски.
Во општините каде што е прогласена епидемија ќе бидат испратени и СМС-пораки со препораки за постапување, подготвени од Институтот за јавно здравје.
Во меѓувреме, Државниот здравствен и санитарен инспекторат извршил вонредна проверка на спроведувањето на елаборатите за прскање во сите општини од Скопскиот регион. Резултатите од контролите треба да бидат соопштени наскоро.
Клековски најави дека фокусот во следниот период ќе биде ставен на таргетирано прскање од земја, додека аеропрскањата ќе продолжат согласно утврдените планови.
„Сметаме дека поефективно е таргетирано прскање, отколку со аеро“, рече министерот, додавајќи дека средствата што се користат за прскање се одобрени од Светската здравствена организација.
Се работи и на геолокација на пациентите и на стоечките води. Клековски посочи дека Град Скопје, со помош на „Гугл мапс“, лоцирал поголем број водени површини во засегнатите подрачја, меѓу кои и такви што се користат за рекреативни цели.
Тој апелираше на поголема претпазливост и намалување на непотребните стоечки водени површини, особено во дворовите и околината на домовите. Според епидемиолошките очекувања, август и септември историски се периодот кога ваквите епидемии достигнуваат врв, поради што Центарот за јавно здравје се подготвува за засилено прскање од земја.
