Полицијата го затвори пристапот на патеката после мостот. Најверојатно сопствениците на угостителските објекти сами ќе ги отстрануваат платформите кои се во Езерото. Овој чекор доаѓа откако ЕВН ги остави без напојубање со електрична енергија.
Плажите на кои им е исклучена струјата се опфатени со ГУП от, но немаат договори за концесија. Оние што не се опфатени со ГУП от веќе се срушени, велат од општина Охрид.
На десетина дена до истекот на рокот, деновиве беше урната плажата Atlantic во Елешец. Градоначалникот Константин Георгиески неодамна обелодени дека поранешни концесионери на плажи на брегот на Охридското Езеро во период кога немале активни договори за концесија остварувале милиони денари приход.
Георгиески најави дека ќе се пристапи и кон отстранување на платформите и објектите на плажите во градската зона од каналот „Студенчишта“ кон „Горица 1“ и плажите во делот на населбата „Канео“, кои се опфатени во Генералниот урбанистички план.
Од охридскиот угостителски еснаф сметаат дека не треба сега да се преземаат акции за рушење на атрактивни плажи, според нив тајмингот е погрешен.
Денешната акција се споведува без инциденти. Се отстрануваат платформите на плажите Куба, Кадмо, Бела Виста, а ќе се отстранува и платформата пред некогашната плажа Горица 1, а мостот ќе се врати во првобитна состојба.
