Најстариот син на Нетанјаху го промени името во Јонатан Хун

Најстариот син на израелскиот премиер Бенјамин Нетанјаху, Јаир Нетанјаху, официјално го променил своето име во Јонатан Хун, објави израелскиот весник „Хаарец“, повикувајќи се на даночни документи.

— реклама —

Според весникот, даночната пријава за 2026 година била поднесена под новото име, но со истиот матичен број и истата адреса како и претходната пријава, поднесена под неговото родено име.

Името Јонатан го носел неговиот чичко, братот на премиерот Бенјамин Нетанјаху, кој загина во 1976 година за време на познатата операција „Ентебе“, кога израелските специјални сили ослободија заложници во Уганда.

— реклама —

Презимето Хун, пак, е презимето на дедото на Јаир по мајчина линија, Самуел Хун, пред неговото семејство да го хебреизира презимето.

— реклама —

Засега не е познато дали Јаир Нетанјаху во јавноста ќе продолжи да настапува под новото име или промената е направена од други причини. На своите профили на социјалните мрежи тој сè уште го користи старото име.

Триесет и четиригодишниот Јаир Нетанјаху во последните неколку години живее во американската сојузна држава Флорида. Познат е како десничарски активист и водител на поткаст, а често привлекува внимание со своите објави на социјалните мрежи и врските со политичари од десницата во Европа и САД.

— реклама —

И неговиот помлад брат Авнер претходно официјално го промени своето име, наведувајќи дека тоа го направил од безбедносни причини за време на студиите во Лондон. Сличен чекор во минатото направил и самиот Бенјамин Нетанјаху, кој за време на студиите во САД го користел името Бен Нитаи за полесен изговор на презимето.