Наместо да ги достави пензиите, поштар од БиХ заминал на Тајланд

Наместо да ги достави пензиите до жителите на Вишиќи во Чапљина, поштар од Босна и Херцеговина заминал на Тајланд со службените пари, а при обидот да се врати во земјата бил уапсен.

— реклама —

Станува збор за Стипе Јукиќ од Чапљина, кого полицијата го лишила од слобода вчера на граничниот премин Бијача. Тој на почетокот на септември исчезнал, заедно со парите наменети за исплата на пензиите.

Неговото исчезнување било пријавено на 7 септември, откако неговата мајка два дена немала контакт со него. Истрагата покажала дека Јукиќ на 5 септември со својот автомобил заминал за Мостар. Автомобилот и мобилниот телефон биле пронајдени во хотел, каде што, според истрагата, биле оставени за да се прикријат трагите.

— реклама —

Наместо да остане во земјата, Јукиќ истиот ден заминал на аеродромот во Сараево и отпатувал за Бангкок. Додека полицијата го истражувала случајот и се утврдувало колку пари недостигаат од поштенската каса, на социјалните мрежи се појавиле видеоснимки на кои тој ужива на Тајланд.

— реклама —

По случајот била распишана централна потерница поради сомнение за тешка проневера на службени средства.

По околу две недели поминати во Бангкок, Јукиќ вчера попладне се појавил на граничниот премин Бијача, при обид повторно да влезе во Босна и Херцеговина. Граничната полиција го идентификувала и го лишила од слобода, по што бил предаден на инспекторите од полициската управа во Чапљина.

За случајот бил известен надлежниот јавен обвинител во Мостар. Јукиќ се соочува со кривична одговорност за проневера и злоупотреба на службената положба.