Либерално-демократската партија не го поддржа предложениот Закон за високата раководна служба, оценувајќи дека наместо суштинска реформа, со него се нуди само привид на професионализација на администрацијата.
Претседателката на ЛДП и пратеничка во Собранието, Моника Зајкова, изјави дека со овој закон Владата ја пропуштила можноста да покаже дека професионалноста е поважна од партиската припадност.
Според Зајкова, иако власта зборува за воведување мерит-систем, таа и понатаму го задржува клучното влијание при изборот на високите раководители.
„Ако навистина се избира најдобриот кандидат, тогаш нема логика Владата да избира од листа на тројца кандидати. Тоа не е департизација, туку политичката дискреција добива нова законска форма“, посочи Зајкова.
Од ЛДП забележуваат и дека најважните критериуми и компетенции за високите раководни лица не се утврдени со закон, туку ќе ги пропишува Владата со уредба, што, според нив, остава простор секоја идна влада да ги менува правилата според сопствените потреби.
Партијата смета дека условите предвидени во законот и натаму не се доволни за управување со институции кои располагаат со значителни буџети и носат важни одлуки за граѓаните. Како пример се посочува фактот дека за овие позиции се бараат само пет години работно искуство и две години раководно искуство или искуство во управување со проекти.
„Водење проект не е исто што и раководење со сложена државна институција“, оценува Зајкова, додавајќи дека законот не прецизира што точно подразбира „соодветно искуство“, оставајќи можност за различни толкувања.
Таа смета дека професионалните раководители не треба да бидат ограничени со фиксен мандат, туку да останат на функцијата сè додека работат законито, стручно и успешно.
„На Македонија не ѝ треба козметичка реформа, туку храбар систем во кој политиката ќе ги креира политиките, а професионалците независно ќе ги спроведуваат. Сè додека Владата го има последниот збор, не можеме да зборуваме за вистинска департизација, туку само за подобро регулирана партиска контрола“, изјави Зајкова.
