Гасовите и надуеноста се нормален дел од процесот на варење, но одредени навики и намирници можат значително да го зголемат нивното појавување, предупредуваат нутриционистите.
Регистрираната диететичарка Кери Рајкер објаснува дека пребрзото јадење, џвакањето мастики, пиењето со сламка или зборувањето за време на оброкот може да доведе до голтање повеќе воздух, што подоцна резултира со појава на гасови.
„Гасовите можат да настанат и поради непреработена храна, особено ферментирачки јаглехидрати. Консумирањето одредени намирници или поголеми количини специфична храна може да ја засили ферментацијата во цревата, што доведува до поголемо создавање гасови“, вели Рајкер, пренесува „EatingWell“.
Таа посочува дека важна улога имаат и бактериите во дигестивниот систем, а промените во цревниот микробиом или нивниот прекумерен раст можат дополнително да придонесат за надуеност и поинтензивно создавање гасови.
Една од намирниците што често се поврзуваат со оваа појава е прокељот. Иако е богат со хранливи материи и е популарен избор во здравата исхрана, кај некои луѓе може да предизвика непријатности.
„Рафинозата, јаглехидрат што се наоѓа во зеленчукот од семејството на зелките, како брокулата, карфиолот и прокељот, може да ја зголеми продукцијата на гасови за време на варењето“, објаснува Рајкер.
Експертите нагласуваат дека реакцијата на храната е индивидуална и дека не сите луѓе ќе имаат исти симптоми. Затоа, доколку забележите дека одредени намирници редовно ви предизвикуваат надуеност и гасови, најдобро е да водите сметка за нивното количество или да се консултирате со стручно лице.
