Кинеските авиокомпании нарачаа вкупно 95 патнички авиони од европскиот производител „Ербас“, чија каталошка вредност изнесува околу 17,8 милијарди долари (околу 15,3 милијарди евра), во обид да ги прошират своите капацитети и да ги модернизираат флотите со поекономични летала.
Националниот авиопревозник „Ер Чајна“ и неговата подружница „Шенжен ерлајнс“ ќе купат вкупно 55 авиони со каталошка вредност од 12,4 милијарди долари (околу 10,7 милијарди евра), пренесе Ројтерс.
„Ер Чајна“ нарача 15 авиони од типот А350-900, вредни околу 6,09 милијарди долари (околу 5,2 милијарди евра), додека „Шенжен ерлајнс“ ќе набави 40 авиони од семејството А320neo, чија каталошка вредност изнесува околу 6,35 милијарди долари (околу 5,5 милијарди евра).
Во меѓувреме, „Хаинан ерлајнс“ соопшти дека ќе купи уште 40 авиони А320neo со каталошка вредност до 5,4 милијарди долари (околу 4,6 милијарди евра), а испораката на сите летала е планирана во периодот од 2028 до 2032 година.
Од „Ер Чајна“ наведоа дека реалната цена ќе биде значително пониска од каталошката, бидејќи „Ербас“ одобрил вообичаени попусти за големи нарачки. Финансирањето ќе биде обезбедено со комбинација од сопствени средства, банкарски кредити и други извори.
Новите летала треба да го зголемат вкупниот патнички и товарен капацитет на групацијата „Ер Чајна“ за околу 7,1 отсто, додека капацитетот на „Шенжен ерлајнс“ ќе се зголеми за околу 4,3 отсто.
Дел од новите авиони ќе ги заменат постарите летала што постепено се повлекуваат од употреба. Нарачките доаѓаат во време кога кинеските авиокомпании продолжуваат со обновата и проширувањето на своите флоти по пандемијата, и покрај притисокот врз профитабилноста поради високите цени на горивата.
