Народна банка не открива дали Алта банка-Битола има институции како свои клиенти, оти тоа е банкарска тајна

Народната банка не евидентирала милионски трансфери од Србија кон Алта банка АД Битола во периодот по 26 октомври, ниту располага со податоци што би ги потврдиле тврдењата за перење пари преку такви трансакции. Во одговор на прашања од Скопје1, централната банка открива дека приливите од Србија во Македонија во овој период изнесувале околу 16.000 евра, додека одливите во обратна насока биле приближно 180.000 евра.

Одговорот следува по информациите и обвинувањата во јавноста за можни трансфери на големи суми пари поврзани со случувањата во српската Алта банка.

„Согласно со информациите со кои располага Народната банка не се забележани такви трансакции. По 26 октомври вкупните одливи од клиентите на АЛТА банка АД Битола кон Србија изнесуваат околу 180.000 евра, а приливите од Србија во земјава во истиот период околу 16.000 евра“, одговорија од Народната банка за Скопје1.

— реклама —

Според централната банка, станува збор за редовни плаќања на клиентите, поврзани со нивните деловни активности, меѓу кои и плаќања за увоз на стоки од мали бизниси во Македонија.

„Не се евидентирани милионски трансфери на средства од Србија, ниту податоци што би ги потврдиле тврдењата за такви одливи и перење пари. Ако се појават нови сознанија, ќе постапиме согласно закон“, наведуваат од Народната банка.

— реклама —

Скопје1 побара одговор и на прашањето дали државни институции, јавни претпријатија, општини или компании во државна сопственост имаат сметки и средства во Алта банка АД Битола.

Народната банка не открива кои институции или компании се клиенти на банката, повикувајќи се на законската обврска за заштита на банкарската тајна.

„Согласно Законот за банки, податоците за поединечни клиенти на банките, без оглед дали станува збор за физички или правни лица, претставуваат банкарска тајна. Поради тоа, Народната банка не може да дава информации за тоа кои конкретни институции, претпријатија, општини или компании имаат сметки или средства во одредена банка“, се наведува во одговорот.

— реклама —

Со ова, останува неодговорено дали и колкав износ на јавни средства евентуално се наоѓа на сметки во банката.

Од Народната банка дополнително посочуваат дека го следат работењето на Алта банка АД Битола и бараат решенија за правните лица кои треба да исплатат плати и да ги подмират обврските за даноци и придонеси.

— реклама —

Во моментов, правните лица можат да вршат внатрешни плаќања меѓу сметки во истата банка без ограничување на износот. Тоа, сепак, не значи дека можат без ограничување да префрлаат средства кон други банки.

„Правните лица можат да вршат внатрешни плаќања во рамките на Банката без ограничување на износот, а јавноста ќе биде навремено информирана за сите промени“, соопшти Народната банка.

Од централната банка не прецизираат кога ќе биде обезбедено решение за компаниите што треба да исплатат плати или да извршат плаќања кон сметки во други банки.