Земјите на НАТО разговараат за ставање во состојба на готовност на нуклеарните боеви глави на алијансата, изјави генералниот секретар на НАТО, Јенс Столтенберг за британскиот весник Телеграф.
„Нема да навлегувам во оперативните детали за тоа колку нуклеарни боеви глави треба да бидат на подготвеност, но мора да се консултираме за овие прашања. Токму тоа го правиме“, рече генералниот секретар на НАТО.
Столтенберг објасни дека НАТО мора да му го покаже на светот својот нуклеарен арсенал за да испрати директен сигнал до непријателите на Северноатлантската алијанса.
Тој додаде дека Кина активно инвестира во својот нуклеарен арсенал, кој, според него, до почетокот на 2030-тите ќе порасне на илјада боеви глави.
„И тоа значи дека во не толку далечна иднина НАТО веројатно ќе се соочи со нешто со кое никогаш досега не се соочил, имено со два потенцијални противници со нуклеарно оружје – Кина и Русија. И, се разбира, тоа има последици“, рече Столтенберг.
