Изменетите климатски услови би можеле значително да го зголемат ризикот од шумски пожари во Европа во наредните децении. Ново истражување покажува дека, дури и во најповолното климатско сценарио, површината зафатена со пожари би можела да се зголеми за 39 отсто до крајот на векот доколку не се преземат дополнителни мерки за управување со пожарите.
Причината се сè почестите периоди со високи температури, суша и силен ветер, услови кои овозможуваат малите пожари брзо да прераснат во големи и тешко контролирани огнени стихии.
Во најпесимистичкото сценарио, кое предвидува глобално затоплување од 3,6 степени Целзиусови, изгорените површини во Европа би можеле речиси да се зголемат тројно. Подоброто управување со пожарите може значително да го ублажи овој тренд, но не и целосно да го спречи.
„Инвестициите во управувањето со пожарите можат да помогнат до одреден степен, но доколку продолжиме со високи емисии, изгорените површини и натаму значително ќе растат“, изјавил главниот автор на истражувањето, Маик Билинг, од Потсдамскиот институт за истражување на влијанието на климата.
Истражувањето доаѓа во период кога Европа веќе се соочува со една од најтешките сезони на пожари. Според европските податоци, досега се изгорени повеќе од 600.000 хектари, а во Белгија, Франција и Словачка се регистрирани рекордни изгорени површини за овој период од годината.
Научниците ги споредиле проекциите за периодот од 2070 до 2100 година со моделите за 2000–2030 година и заклучиле дека главниот фактор за зголемувањето на ризикот се временските услови што го поттикнуваат ширењето на огнот.
Истражувачите, сепак, предупредуваат и на парадоксален ефект од подобреното гасење пожари. Децениското брзо сузбивање и на малите пожари довело до натрупување сува вегетација, која во услови на екстремна суша и топлина претставува дополнително „гориво“. Тоа може да резултира со поретки, но многу поинтензивни пожари.
Затоа научниците нагласуваат дека подобрувањето на противпожарната заштита е важно, но не може да биде замена за намалувањето на емисиите и справувањето со климатските промени.
