Научници открија неочекувана последица од тежок облик на ковид-19: Се активираат „заспани“ вируси

Тешките форми на ковид-19 и постковидниот синдром можат да доведат до повторно активирање на различни вируси на херпес и други „заспани“ патогени во организмот, покажува истражување на научници од Детската болница во Бостон, во САД.

— реклама —

Според истражувачот Офер Леви, ова откритие е особено важно за подобро разбирање на постковидниот синдром, бидејќи милиони луѓе низ светот и натаму се соочуваат со неговите долгорочни последици.

— реклама —

Научниците објаснуваат дека кај многу луѓе во организмот постојат „заспани“ вируси кои имунолошкиот систем вообичаено ги држи под контрола. Меѓу нив се различни типови на вирусот херпес, цитомегаловирусот, вирусот Епштајн-Бар и одредени вируси од семејството Anelloviridae.

До овие заклучоци истражувачите дошле по анализа на околу 200.000 примероци од биолошки материјал земени од 1.150 пациенти лекувани во 20 медицински центри во САД. Во примероците од плунка и издишан воздух биле откриени РНК-фрагменти од повеќе „заспани“ вируси, кои повторно станале активни кај пациенти што прележале тежок облик на ковид-19.

— реклама —

Истражувањето покажало дека повисоката активност на овие вируси е поврзана со значително поголем ризик од развој на постковиден синдром и други хронични здравствени проблеми по закрепнувањето.

Научниците утврдиле и дека повторното активирање на вирусите најчесто го предизвикуваат силните воспалителни процеси за време на акутната фаза на инфекцијата и во првите недели по неа, што, според нив, укажува на потреба од дополнителни истражувања за врската меѓу системските воспаленија и хроничните вирусни инфекции.