Голем дел од Западна Европа е погоден од силен топлотен бран со невообичаено високи температури за овој период од годината. Од Обединетото Кралство и Ирска, преку Франција и Германија, па сè до Шпанија и Италија, милиони луѓе се соочуваат со екстремна жештина пред официјалниот почеток на летото.
Според експертите, причината за ваквата состојба е таканаречената „топлотна купола“ – моќен систем на висок воздушен притисок што носи топол воздух од Северна Африка и го задржува над Европа.
Научниците предупредуваат дека ваквите појави стануваат сè почести како последица на климатските промени. Според податоците на европската служба за климатски промени „Коперникус“, во последните 25 години значително се зголемила зачестеноста на топлотните бранови.
„Температури од вакви размери некогаш беа исклучок дури и во средината на летото. Оваа рекордна жештина јасно ги покажува последиците од климатските промени“, изјави климатологот Фридерике Ото од Империјалниот колеџ во Лондон.
Најновиот извештај „Европска климатска состојба“ покажува дека во текот на 2025 година најмалку 95 проценти од европскиот континент забележале температури над просекот. Екстремни горештини биле регистрирани дури и северно од Арктичкиот круг, а температурата на морската површина достигнала рекордни вредности.
Експертите посочуваат дека Европа се загрева двојно побрзо од глобалниот просек. Просечната температура на континентот е повисока за 2,5 степени Целзиусови во споредба со прединдустрискиот период, додека глобалниот просек изнесува 1,4 степени.
Научниците дел од причините ги гледаат во близината на Европа до Арктикот, кој се загрева уште побрзо. Дополнително, промените во воздушните струења доведуваат до подолготрајно задржување на екстремните временски услови над истите подрачја.
Во извештајот се наведува и необичен парадокс. Подобрувањето на квалитетот на воздухот во Европа и намалувањето на индустриското загадување придонеле за намалување на честичките што претходно делумно ја одбивале сончевата светлина, со што се намалил и нивниот ефект на природно разладување.
Светската метеоролошка организација предупредува дека во следните пет години се очекуваат температури блиску до рекордни вредности и дека е многу веројатно светот да добие нова најтопла година во историјата пред 2031 година.
Генералниот секретар на Обединетите нации, Антонио Гутереш, неодамна повика на забрзани активности за ограничување на порастот на глобалната температура и намалување на зависноста од фосилните горива, со цел да се обезбеди посигурна и поодржлива иднина.
