Ново истражување покажува дека едноставни вежби со пишување ракопис би можеле да помогнат во раното откривање на когнитивно опаѓање и болести како Алцхајмеровата болест.
Истражувањето е спроведено од научници од Универзитетот во Евора во Португалија, а во него учествувале 58 лица на возраст од 62 до 99 години.
Научниците користеле дигитално пенкало и таблет, а учесниците имале задачи како цртање линии, препишување реченици и пишување по диктат.
Најголеми разлики биле забележани кај задачата со диктат, каде што лицата со когнитивни оштетувања пишувале побавно и со поинаква организација на движењата.
„Пишувањето не е само моторна активност, туку прозорец кон мозокот“, изјавила истражувачката Ана Рита Матијаш.
Според научниците, когнитивното опаѓање влијае врз способноста на мозокот да ги организира и координира движењата при сложени задачи.
Иако резултатите се охрабрувачки, истражувачите посочуваат дека се потребни поголеми студии за методот да може да се користи како достапна и брза алатка за рана дијагностика.
