Нави Пилеј ја доби Нобеловата награда за мир, Израел возврати со жестоки критики

Израелското Министерство за надворешни работи остро реагираше на доделувањето на Нобеловата награда за мир за 2026 година на јужноафриканската правничка Наванетем „Нави“ Пилеј, обвинувајќи ја за политички мотивирана кампања против Израел.

„Ако постоеше награда за лаги, омраза и крвави клевети, Нави Пилеј не само што ќе беше кандидатка, туку ќе беше и фаворитка“, објави израелското МНР на социјалната мрежа „Икс“.

— реклама —

— реклама —

Во реакцијата се наведува дека доделувањето на наградата не претставува признание за правдата, туку, според израелската страна, средство за легитимирање на омразата и предрасудите кон Израел.

Израелското министерство во соопштението го спомена и Јозеф Гебелс, министерот за пропаганда на нацистичка Германија, наведувајќи дека тој би аплаудирал по одлуката на Нобеловиот комитет.

— реклама —

Пилеј претседаваше со истражна комисија на Обединетите нации, која во 2025 година заклучи дека Израел извршил геноцид во Појасот Газа. Израел ги отфрли овие обвинувања.

Нобеловиот комитет соопшти дека Пилеј ја добива наградата за нејзините напори за унапредување на мирот и меѓународното право. Таа е поранешна судијка на Меѓународниот кривичен суд и поранешна висока комесарка на ОН за човекови права.

Во текот на кариерата Пилеј работела и на случаи поврзани со геноцидот во Руанда и со апартхејдот во Јужна Африка. Наградата треба да ѝ биде врачена на церемонија во Осло на 10 декември.