Пратеничката и лидерка на ЛДП, Моника Зајкова, остро реагираше на состојбите во локалните самоуправи, посочувајќи дека граѓаните секојдневно се соочуваат со проблеми со отпадот, прашината, раскопаните улици, јавниот превоз и недоволните комунални услуги.
Во објава на социјалните мрежи, Зајкова вели дека не може успехот на градоначалниците да се мери според бројот на издадени одобренија за градба, додека градовите, како што наведува, се „гушат во бетон, ѓубре, прашина и хаос“.
„Таму каде што вчера имало една куќа и една зелена канта, денес никнуваат три згради со десетици станови, а кантата останува истата. И после се чудиме зошто ѓубрето е по улиците, зошто животни го развлекуваат, зошто контејнерите прелеваат и зошто никој не се чувствува надлежен“, напиша Зајкова.
Таа посочува и на, како што вели, бавното одвивање на инфраструктурните зафати, наведувајќи дека е „срамно и 50 метри улица да се прават две години“, додека жителите се соочуваат со прашина, оштетени автомобили и проблеми со автобускиот превоз.
Зајкова критикува и, како што ги нарекува, „ПР-активностите“ за секоја закрпена дупка или поставен метар асфалт, нагласувајќи дека тоа не треба да се претставува како подарок за граѓаните, туку како обврска на локалната власт.
Во објавата таа ги споменува и состојбите со водоснабдувањето во Гостивар и проблемите со отпадот во Скопје, предупредувајќи дека нехигиената во општините може да создаде услови за ширење бактерии, инфекции и болести.
Како решение, Зајкова предлага да се донесе закон со кој ќе се овозможи отповикување на градоначалниците, како и конечно да се донесе Закон за комунална полиција.
„Ако некој не ја врши функцијата за која е избран, граѓаните не смеат четири години да бидат осудени да го трпат“, порача таа.
Зајкова додава дека граѓаните не ги интересира бројот на објави и прес-конференции, туку дали имаат чисти улици, чиста вода за пиење, функционален јавен превоз и соодветни услови за живот.
„Имаме очи – гледаме. Имаме нос. Имаме интелигенција. Живееме тука“, напиша таа, додавајќи дека состојбата, според неа, веќе не може да се оправдува со бавна администрација или ненамерен пропуст.
