„Не ги користете мртвите деца за политички поени, ниту пак живите деца кои сè уште чекаат мир“, вели Моника Зајкова

Претседателката на ЛДП, Моника Зајкова, реагираше на обвинувањата дека поддржува геноцид, порачувајќи дека не оправдува воени злосторства, тероризам или убивање цивили, без разлика на нивната националност, вера или политичка припадност.

Таа праша дали фотографирањето на Црвениот плоштад во Москва значи поддршка за воените злосторства на Кремљ, како и зошто не се осудуваат злосторствата на Хамас, руската агресија врз Украина, масакрот во Буча, прогоните во Русија и Иран и експлоатацијата на работниците во Кина.

— реклама —

Зајкова нагласи дека осудата на злосторствата врз палестинските цивили и осудата на тероризмот врз израелските цивили не се спротивставени позиции, бидејќи ниту едно злосторство не оправдува друго.

Таа посочи дека европското либерално семејство АЛДЕ, чија членка е ЛДП, во октомври 2025 година усвоило резолуција за конфликтот во Газа, со барања за заштита на цивилите, хуманитарен пристап, прекин на огнот и траен мир. Додаде дека и Парламентарното собрание на ОБСЕ, во кое дејствува, усвоило декларации во 2024 и 2025 година со барања за хуманитарна помош за Газа, заштита на цивилите и почитување на меѓународното право.

— реклама —

„Ниту сум поддржувала, ниту некогаш ќе поддржам геноцид, воени злосторници, тероризам или убивање цивили. Ниту во Палестина, ниту во Украина, ниту во Израел, ниту каде било! Детскиот живот нема националност, религија или политичка боја“, порача Зајкова.

— реклама —

Таа ги повика политичарите да не ги користат загинатите деца за политички поени, ниту децата кои сè уште чекаат мир, нагласувајќи дека за неа не постојат „наши“, „ваши“ или „нивни“ деца, туку само деца.

Во завршницата на реакцијата, Зајкова предупреди дека колективното обвинување и осудување се одлики на фашистичките и другите опасни тоталитарни идеологии, за кои историјата веќе платила висока цена.