Не ја земајте Европа за пример само кога треба нешто да му се одземе на работникот, ѝ порача Ампева на Стопанската комора

Кристина Ампева, активистка за работнички и човекови права, поранешна текстилна работничка и една од основачките фигури на „Гласен текстилец“, реагираше на предлогот на Стопанската комора за промена на начинот на користење на неработните денови, порачувајќи дека споредбите со Европа не треба да завршуваат само кај празниците.

„Кога веќе Стопанската комора реши да нè споредува со Европа и да објаснува дека имаме многу празници, ајде тогаш да се споредиме со Европа до крај. Не само таму каде што им одговара“, напиша Ампева.

— реклама —

Таа посочува дека во Македонија во 2026 година има 11 неработни празници што важат за сите граѓани и тврди дека поголемите бројки што се споменуваат во јавноста ги вклучуваат и празниците на различните верски и етнички заедници.

Ампева прави споредба и со други европски држави, наведувајќи дека Романија има 16 празнични датуми, Бугарија 15, Чешка, Словенија и Шведска по 13, а Франција 11.

— реклама —

Но, според неа, ако веќе се прават европски споредби, тогаш треба да се споредат и платите.

„Ајде сега да споредиме и нешто друго. Колкава е минималната плата? Кај нас е околу 626 евра бруто“, пишува Ампева, наведувајќи суми од 1.050 евра за Хрватска, 1.278 за Словенија, 1.823 за Франција, 2.343 за Германија, 2.391 за Ирска и 2.704 евра за Луксембург.

Таа го отвора и прашањето за прекувремената работа и работата на празник, прашувајќи колку компании во Македонија навистина им го исплаќаат на работниците она што законски им следува и колку вработени молчат поради страв дека би можеле да останат без работа.

— реклама —

Ампева се осврнува и на положбата на бремените работнички, посочувајќи ги случаите во кои на жени не им се продолжуваат договорите откако ќе соопштат дека се бремени. Во тој контекст ја споменува и општата препорака на Комисијата за спречување и заштита од дискриминација за заштита од дискриминација поради бременост, раѓање и мајчинство.

Според неа, споредбата со Европа треба да го опфати и животниот стандард, односно колку од платата му останува на работникот откако ќе ги плати храната, струјата, киријата или кредитот, лековите, превозот и трошоците за децата.

— реклама —

„Европа не е само помалку празници. Европа е и повисока плата. Европа е платен прекувремен труд. Европа е платена работа на празник. Европа е заштита на бремена работничка. Европа е достоинствен живот од сопствената работа“, порача Ампева.

„Ако веќе ја земаме Европа за пример, ајде да не ја земаме само тогаш кога треба нешто да му се одземе на работникот. Ајде да ја земеме цела! Ако анализирате, анализирајте до крај, лепотани!“, завршува таа.