Семејството на Тоше Проески јавно се огласи откако на платформата „Ивентим Хрватска“ беше објавена продажба на билети за концерт во чест на македонската музичка легенда, најавен под насловот „Тоше засекогаш – музика која живее“ („Toše Forever – Glazba koja živi“), кој треба да се одржи во Сплит.
Во соопштението, објавено од сестрата на Тоше Проески, Дора Проеска, се наведува дека семејството нема никаква поврзаност со овој настан и дека дел од информациите што се пласираат се неточни.
„Јавно и недвосмислено сакаме да ве известиме дека оваа информација не е точна. Нема да настапат Кристијан, ниту придружниот бенд на Тоше. Организаторите немаат ниту службена дозвола од нас за негово одржување, а ние сме единствените носители на правата“, стои во објавата.
Семејството истакнува дека секој искрен настан организиран во чест на Тоше Проески е доказ дека неговата музика и дело продолжуваат да живеат, но додава дека нема да дозволи злоупотреба на неговото име.
„Секој искрен настан организиран во чест на Тоше е доказ дека неговата музика и дело продолжуваат да живеат. Но, нема да дозволиме отворена манипулација со неговото име и неговата публика“, наведуваат од семејството.
Воедно, упатија апел до неговите обожаватели да бидат внимателни и да не наседнуваат на, како што велат, „невистини и комерцијални манипулации“.
„Ве замолуваме да не наседнувате на невистини и комерцијални манипулации што си играат со емоциите на сите што го сакаат Тоше Проески“, се вели во пораката.
