Адвокатката на Дејан Јованов – Деко, сопственикот на дискотеката „Пулс“, Ивана Коцевска, реагираше на новата истрага и повторното определување притвор за нејзиниот клиент, оценувајќи дека одлуката на Обвинителството била однапред подготвена.
Коцевска рече дека не е изненадена од одлуката, но дека е вознемирена од тоа што новата истрага е отворена непосредно пред истекот на законскиот рок во кој Јованов можеше да остане во притвор.
„Не сум изненадена, но сум вознемирена. Сметам дека ова е конструкција на Обвинителството, а одлуката за притвор, според мене, е однапред донесена“, изјави Коцевска.
Законскиот рок за притворот на Јованов истекува утре, по што тој требаше да биде пуштен од затвор. Сепак, со отворањето на новата истрага и новата одлука на судот, тој останува во притвор.
Новата истрага се однесува на сомневања за давање поткуп на вработен во Министерството за економија со цел Јованов да добие лиценца за работа, иако, според Обвинителството, бил свесен дека објектот не ги исполнува законските услови.
Адвокатката смета дека прашањата поврзани со лиценцата и исполнувањето на условите во објектот веќе се предмет на разгледување во постапката поврзана со трагедијата во „Пулс“.
„Овие наводи веќе се дел од расправата во предметот за трагедијата во „Пулс“. Сметам дека под притисок на јавноста се отвора нова истрага, која претставува конструкција и измислица“, рече Коцевска.
Јованов денеска доби нов 30-дневен притвор, а утре треба да биде префрлен од Куманово во затворот во Шутка.
