Сè уште се трага по Љупчо Стојановски, а неговото семејство вели дека нема никакви нови информации за тоа каде се наоѓа и што досега е преземено од надлежните институции.
Внукот Дарко за „Скопје1“ вели дека семејството веќе не знае каде да се обрати и што дополнително да направи за потрагата да се придвижи.
„Не знам веќе каде да се обратам, не знам што повеќе да направам. Никакви информации не сум добил. Имаме кажано каде е последен пат виден, а инспекторите за потрага немаат никаква почетна точка. Не знам ниту дали камери се прегледани, ниту дали има нешто досега направено“, вели Дарко.
Според него, семејството нема информација ниту дали е побарано испитување на базните станици за да се утврди кога и каде последен пат бил активен мобилниот телефон на Љупчо.
„Никакви новости, никаква помош од надлежните органи“, додава тој.
Дарко вели дека, според негово мислење, најважни за ваква потрага се првите денови по исчезнувањето, кога треба да се проверат луѓето со кои исчезнатиот последен пат имал контакт, можните локации и евентуалните проблеми што можеле да претходат на исчезнувањето.
„Не знам јас како одат тие работи, но мое мислење е дека најбитни се првите денови – да се направи истрага, да се повикаат луѓето со кои имал последно контакт, да се види дали имал со некого проблеми. Во денешно време сè е можно и на сè помислувам“, вели Дарко.
Семејството и понатаму апелира до јавноста доколку некој го забележал Љупчо Стојановски или има каква било информација што може да помогне во потрагата, веднаш да пријави во полиција на 192 или на единствениот број за итни повици 112.
На плакатот што го споделува семејството е наведен и контакт-бројот 073 717 090.
Потрагата по Љупчо Стојановски продолжува, а неговите најблиски велат дека нема да се откажат додека не добијат одговор каде е и што му се случило.
