Недостиг од кадар во 23 европски земји: Здравствените работници меѓу најбараните

Наставниците, здравствените работници и ИТ-стручњаците се меѓу најбараните кадри во Европа, покажува анализа на Организацијата за економска соработка и развој (ОЕСР), пренесува „Еуроњуз бизнис“.

— реклама —

Иако притисокот на пазарот на трудот е намален во споредба со периодот по пандемијата, работодавците и понатаму тешко наоѓаат квалификувани работници, особено за професиите што бараат високо ниво на знаење.

Меѓу земјите од Европската Унија опфатени со анализата, најтешко се пополнуваат работните места во образованието, по што следуваат здравството и секторот за информатички и комуникациски технологии. Во поширокиот преглед на 27 европски земји, здравствени работници недостигаат во 23, наставници во 21, а ИТ-стручњаци во 18 земји.

— реклама —

Недостигот од здравствени работници се поврзува со стареењето на населението, долгото образование, тешките услови за работа и зависноста од кадар од странство. Во образованието, пак, проблем претставуваат зголемените административни обврски, дигитализацијата на наставата и поголемата одговорност за благосостојбата на учениците.

— реклама —

Сепак, побарувачката значително се разликува од земја до земја. Во Норвешка најтешко се наоѓаат работници за физички работи, додека во Шпанија недостигаат помошни работници во подготовката на храна. Од друга страна, Австрија, Швајцарија и Обединетото Кралство се меѓу земјите во кои ОЕСР бележи релативен вишок ИТ-стручњаци.

Европската агенција за труд посочува дека недостигот од кадар во една земја може да постои истовремено со вишок работници во друга. Меѓу пречките за нивно поврзување се јазичните бариери, административните постапки и признавањето на стручните квалификации.

— реклама —

Анализата укажува и на потребата од преквалификација и постојано усовршување, додека работодавците треба да вложуваат во подобри услови за работа и задржување на постојните вработени.