Неидентификуван објект падна и експлодираше во Полска, се сомневаат дека е руска ракета

Неидентификуван објект рано утринава паднал во близина на селото Тарнава-Колонија во источна Полска, предизвикувајќи силна експлозија, соопштија полските власти.

Местото се наоѓа во Лублинското Војводство, на околу 95 километри од украинската граница. По пријавите од жителите за силна детонација, армијата, полицијата и другите надлежни служби го обезбедиле теренот и започнале истрага.

Полските вооружени сили засега не соопштуваат за каков објект станува збор, ниту од каде потекнува.

— реклама —

Според неофицијални информации од украински извори, можно е да станува збор за руска крстосувачка ракета Х-101 (Kh-101), но оваа информација сè уште не е потврдена од полските власти.

— реклама —

Првичните информации укажуваат дека објектот влегол во полскиот воздушен простор од правец на Украина, летал на мала височина, а потоа се урнал во близина на селото. Полските медиуми објавија дека бил забележан на радар, по што кон него бил испратен борбен авион Ф-16, но објектот исчезнал од радарските екрани пред да биде идентификуван.

Инцидентот се случил во текот на масовниот руски напад со ракети и беспилотни летала врз повеќе украински градови. Поради нападите, Полска во текот на ноќта ги подигнала своите борбени авиони и ги активирала системите за противвоздушна одбрана за заштита на воздушниот простор.

— реклама —

Според досегашните проценки, постои можност руска ракета, поради дефект, да ја променила траекторијата и да навлегла во полскиот воздушен простор. Сепак, надлежните нагласуваат дека причината за инцидентот ќе биде позната дури по завршувањето на истрагата.

— реклама —

Во меѓувреме, руското Министерство за одбрана соопшти дека извело масовен напад со ракети со долг дострел и беспилотни летала врз украински воени цели.

Според украинските власти, во нападите загинале најмалку осум лица, а најмалку 30 се повредени. Најтешко погоден бил Крив Рих, каде што балистичка ракета погодила семеен дом, при што животот го загубиле шест лица, меѓу кои и две девојчиња на возраст од пет и 12 години. Спасувачките екипи и натаму ги пребаруваат урнатините.