Скопје најавува повеќе промени во сообраќајот, јавниот превоз и управувањето со отпадот. Една од новините е легализирање на пешачкиот премин кај Бит-пазар, каде што треба да бидат поставени соодветна сообраќајна сигнализација и семафори.
Скопскиот градоначалник Орце Ѓорѓиевски, одговарајќи на советничко прашање, информираше дека постојниот нелегален премин ќе биде уреден како официјален пешачки премин, со цел да се зголеми безбедноста на пешаците.
Во делот на јавниот превоз, Ѓорѓиевски потврди дека е потпишан договор за набавка на 100 електрични автобуси, а првите возила се очекува да пристигнат до крајот на годинава.
„Наши тимови, со тим од Министерството за транспорт, работат во Автокоманда и во Ѓорче Петров, каде што ќе бидат поставени полначите, за да не се губи време“, рече Ѓорѓиевски.
Тој најави дека во текот на наредната недела ќе биде распишан и тендерот за БРТ-системот, преку кој се планира набавка на дополнителни 40 еколошки автобуси. Градоначалникот најави и дополнителна набавка на автобуси со средства од Градот Скопје до крајот на неговиот мандат.
Паралелно со инвестициите во јавниот превоз, се најавува и зголемување на капацитетите за собирање отпад. Според Ѓорѓиевски, во четврток треба да пристигнат три нови камиони за собирање отпад, а до крајот на месецов се очекува да бидат доставени околу 3.500 нови контејнери.
Наместо првично планираните 2.000, ќе бидат набавени меѓу 3.500 и 3.600 контејнери, по цена од нешто над 9.000 денари за парче. Ѓорѓиевски посочи дека во изминатите десетина години истите контејнери биле набавувани по цени од 18.000 до 24.000 денари.
Градот ги очекува и дополнителните камиони што треба да ги обезбеди Владата. Во план е и изградба на две нови претоварни станици – едната во Карпош, за потребите на Карпош и Ѓорче Петров, а другата во Гази Баба. Целта е да се намали оптовареноста на постојните капацитети.
Во меѓувреме, вчерашната седница на Советот на Град Скопје ја напуштија советниците од Левица. Како причина го наведоа начинот на кој градоначалникот одговарал на нивните прашања, односно дека одговорите ги дал откако сите советници ги поставиле своите прашања, наместо поединечно.
