Нема директна средба меѓу САД и Иран во наредните денови, соопшти Катар

Катар, кој е една од земјите посредници во разговорите меѓу Иран и САД, соопшти дека во наредните денови не се планирани директни преговори меѓу двете страни во Доха.

— реклама —

Портпаролот на катарското Министерство за надворешни работи, Маџед Ал Ансари, изјави дека американските претставници Стив Виткоф и Џаред Кушнер престојуваат во Доха, каде што ќе имаат средби со катарски посредници и официјални претставници.

„Разговорите ќе опфатат повеќе регионални прашања, вклучително и преговорите со Иран, но и ситуацијата во Либан“, изјави Ал Ансари.

— реклама —

Тој нагласи дека американските претставници не се во Катар за директни разговори со иранската страна и дека засега не е предвидена средба лице в лице, ниту состанок на високо ниво.

— реклама —

Според катарските власти, од иранска страна во Доха престојува техничка делегација, која ќе патува во зависност од напредокот на разговорите.

Техничките дискусии, како што појасни Ал Ансари, се однесуваат на нуклеарната програма, економските прашања, безбедноста и други теми од заеднички интерес.

Иако Катар првично одби да посредува по иранските напади врз негова територија како одговор на американско-израелските акции против Иран, во последните недели земјата повторно презеде поактивна улога во дипломатските напори за намалување на тензиите на Блискиот Исток.