Црногорската полиција ова лето воведе засилен надзор на сообраќајот со помош на дронови, со цел да ја подобри безбедноста на патиштата за време на туристичката сезона, кога кон црногорското приморје се движи голем број домашни и странски возила.
Беспилотните летала се користат на територијата на целата држава, а најголемо внимание е насочено кон централниот и јужниот дел на Црна Гора, каде што во летниот период има значително зголемен сообраќај.
Воздушниот надзор е воведен според практиките што веќе се применуваат во повеќе земји од Европската Унија, каде дроновите се користат за откривање на опасни прекршоци и спречување на сообраќајни несреќи.
Дроновите ќе евидентираат сериозни прекршоци како што се:
пречекорување на дозволената брзина,
непрописно и опасно претекнување,
претекнување колона преку полна линија,
претекнување во непрегледни кривини.
Црногорската полиција најавува дека контролите ќе бидат особено строги на делниците со зголемен ризик од сообраќајни несреќи и дека видеонадзорот и дроновите ќе се користат во текот на целата летна туристичка сезона.
Од полицијата апелираат возачите да ги почитуваат сообраќајните прописи и брзината да ја приспособат на условите на патот. Како што наведуваат, целта на овие мерки не е само казнување, туку пред сè заштита на животите на граѓаните и туристите, во рамки на превентивната кампања „Живеј, не брзај“.
За прекршување на сообраќајните правила во Црна Гора се предвидени високи парични казни. За возење под дејство на алкохол од 0,3 до 0,5 промили казната изнесува од 70 до 200 евра, додека за алкохол од 0,5 до 1,0 промили се движи од 300 до 2.000 евра. Доколку возачот има повеќе од 1,0 промил алкохол во крвта, покрај парична казна, можно е и апсење и затвор до 60 дена.
Некористењето сигурносен појас се казнува со од 40 до 100 евра, користењето мобилен телефон при возење со од 60 до 150 евра, затемнувањето на стаклата со од 150 до 1.000 евра, а непрописниот превоз на деца до пет години со од 40 до 100 евра, односно од 60 до 150 евра за непрописен превоз на деца до 12 години.
