Немирите во Франција ги потресоа европските берзи, штетите од грабежите се мерат во стотици милиони евра

Европските берзи ја започнаа неделата со загуби по насилните протести и грабежи во Франција, додека компаниите пресметуваат огромни штети и бараат од владата подобра заштита на нивните објекти.

— реклама —

Паневропскиот индекс „Стокс 600“ падна за повеќе од 0,6 проценти, францускиот „CAC 40“ за 0,5 проценти, а германскиот „DAX“ за над 0,8 проценти. Акциите на малопродажниот синџир „Карфур“ се намалија за повеќе од два проценти, откако компанијата соопшти дека околу 50 нејзини продавници биле мета на крадци.

Немирите се одразија и врз француските државни обврзници. Приносот на десетгодишните обврзници достигна 4,86 проценти, додека еврото ослабе за 0,2 проценти во однос на доларот и британската фунта.

— реклама —

Насилството избувна за време на саботните национални протести против високите трошоци за живот и состојбата во училиштата, кои прераснаа во немири и грабежи во Париз, Лион, Марсеј, Бордо и други градови. Според објавените податоци, на протестите имало околу 550.000 учесници, а биле уапсени 2.400 лица. Повредени биле меѓу 500 и речиси 1.000 полицајци, жандарми и пожарникари.

— реклама —

Француските трговци предупредуваат на сериозни последици. Александар Бомпар, директор на „Карфур“, изјавил дека биле погодени околу 1.500 продавници, а вкупната штета се проценува на стотици милиони евра. Само поправките на објектите на „Карфур“ ќе чинат повеќе од 10 милиони евра.

Ограбени биле и продавници на модните брендови „Лакост“ и „Ајгл“, а незадоволство изразиле и претставници на други трговски синџири и работодавачки организации, кои бараат посилна реакција од властите.

Францускиот премиер Себастијан Лекорну требаше да претседава со кризен состанок, додека министерот за трговија најави разговори со претставници на трговците, банките и осигурителните компании. Во меѓувреме, синдикатите повикаа на национален штрајк на 5 ноември, што дополнително ја зголемува неизвесноста околу економската состојба во земјата.