Непал денеска го одбележува националниот ден на жалост по катастрофалните поплави и одрони долж границата со Кина, додека спасувачките екипи продолжуваат со потрагата по преживеани и исчезнати лица. Во последните денови од урнатините се спасени четири лица, што дава надеж дека под наносите сè уште може да има преживеани, објавува „Ројтерс“.
Катастрофата се случи на 26 август, кога отцепување на глечер во хималајскиот пограничен појас меѓу Непал и кинески Тибет предизвика огромен одрон. Големи количества кал и камења се урнаа во реката, создавајќи воден бран што однесе населени места и предизвика масовни разурнувања. Патиштата и автопатиштата останаа затрупани под кал и урнатини.
Во катастрофата досега загинале најмалку 1.380 лица, додека повеќе од 5.500 луѓе сè уште се водат како исчезнати. На 13. ден од трагедијата, знамињата на државните институции во Непал, како и на дипломатските претставништва во странство, се спуштени на половина копје. Според хиндуистичката традиција, со тоа се одбележува завршувањето на периодот на жалост, придружено со посебни верски обреди.
Спасувачките тимови во изминатите денови успеале да извлечат четири преживеани лица. Во петокот биле спасени двајца работници од тунел на хидроцентрала, додека во саботата од друг тунел бил извлечен кинески државјанин. Истиот ден била спасена и жена од Непал, која била затрупана во својот дом.
Портпаролот на армијата, Раџа Рам Баснет, изјавил дека спасувачките операции сега се насочени кон подрачјата околу хидроцентралите, бидејќи властите веруваат дека таму би можело да има уште преживеани.
Во меѓувреме, кинеските власти соопштиле дека на другата страна од границата биле пронајдени уште 12 тела, додека потрагата по стотиците исчезнати лица на Тибет продолжува.
Владата не организирала поголеми официјални настани по повод денот на жалост, имајќи предвид дека спасувачките и пребарувачките операции сè уште траат.
„Не организиравме официјални владини програми бидејќи спасувачките и потрагите во поплавените подрачја сè уште траат“, изјавил за „Ројтерс“ Фаниндра Паудел од Националниот центар за итни операции.
Претседателот Рам Чандра Паудел ги посетил најтешко погодените подрачја за да ја процени штетата, соопштил неговиот кабинет.
Премиерот Балендра Шах, пак, објавил дека 923 затвореници биле спасени од окружниот затвор во Нувакот, еден од двата најтешко погодени округа. Чуварите ги преместиле затворениците во објект на повисоко земјиште непосредно пред надојдената вода да навлезе во затворот.
Шах соопштил и дека властите повторно привеле 50 затвореници кои го искористиле хаосот за да го пробијат затворскиот ѕид и портата. Тие биле фатени откако избегале на околу сто метри од затворот.
