Израелскиот премиер Бенјамин Нетанјаху им нареди на вооружените сили на Израел (ИДФ) да преземат, како што наведе, „остри мерки против тероризмот“ по смртоносните судири што вчера се случија во близина на селото Тел на окупираниот Западен Брег.
Според неговиот кабинет, наредбите вклучуваат уривање на домот на лицето осомничено за нападот, спроведување засилени операции во населени места што Израел ги смета за упоришта на тероризмот, како и зголемување на военото присуство низ Јудеја и Самарија – термин што израелските власти го користат за Западниот Брег. Нетанјаху најави и забрзување на легализацијата на постојните и формирање нови израелски населби.
Палестинското Министерство за здравство соопшти дека во инцидентот биле убиени четворица Палестинци, а уште четири лица се повредени. Израелската служба за итна медицинска помош „Маген Давид Адом“ потврди дека загинал и еден Израелец.
Околностите под кои се случил инцидентот сè уште не се целосно разјаснети. Според израелските и палестинските медиуми, израелски доселеници од населбата Хават Гилад влегле во селото Тел, каде што дошло до судир со локалното население.
Палестинската новинска агенција ВАФА тврди дека доселениците го нападнале источниот дел од селото и запалиле продавница, две куќи и земјоделско земјиште. Од друга страна, ИДФ соопшти дека групата Израелци пешачела низ тоа подрачје и дека еден Палестинец му го одзел оружјето на припадник на обезбедувањето, по што отворил оган.
На социјалните мрежи се појавија снимки од инцидентот, но нивната автентичност и околностите под кои настанале не се независно потврдени. ИДФ соопшти дека нивните сили го убиле лицето за кое тврдат дека го одзело оружјето и пукало кон Израелците.
Западниот Брег е под израелска окупација од 1967 година, а насилството во регионот значително се засили по почетокот на војната во Појасот Газа во октомври 2023 година.
Според Обединетите нации, израелските населби на Западниот Брег се сметаат за нелегални според меѓународното право, што Израел го оспорува. Европската Унија во мај најави нови санкции против израелски доселеници поради зголеменото насилство, како и санкции против водечки личности на Хамас.
