Невреме, град и силен ветер ја зафаќаат Грција

Грција во наредните денови ја очекува нагла промена на временските услови – од високи температури и сончево време до поројни дождови, грмежи, локална појава на град и засилен ветер.

Туристите кои престојуваат на Јонското и Егејското Море се предупредуваат да бидат внимателни, бидејќи нестабилното време може да влијае врз престојот на плажите и планираните излети.

— реклама —

Во текот на денешниот ден ќе преовладува сончево и топло време, со температури од 30 до 34 степени Целзиусови во континенталниот дел на земјата, додека на островите ќе биде нешто посвежо, околу 30 степени.

— реклама —

Сепак, од попладневните часови се очекува нестабилност, особено во внатрешноста на Пелопонез и Централна Грција, каде што се можни краткотрајни поројни дождови и локални грмежи, најчесто во планинските предели.

Од утре временските услови дополнително ќе се влошат. Метеоролозите најавуваат поинтензивни грмежливи невремиња, силни електрични празнења и локална појава на град, особено во централните и северните делови на земјата. Нестабилноста може да зафати и делови од поширокото подрачје на Атина.

— реклама —

Во исто време ќе следува постепен пад на температурите. Во текот на викендот максималните дневни температури во најголем дел од Грција ќе се движат меѓу 28 и 30 степени.

— реклама —

За време на викендот ќе дуваат и засилени северни ветрови – мелтеми, особено над Егејското Море, каде што на моменти ќе достигнуваат јачина од 6 до 7 Бофори. Тоа може да предизвика повисоки бранови и да влијае врз условите за капење и одвивањето на дел од траектните линии.

Метеоролозите препорачуваат туристите редовно да ги следат локалните предупредувања и внимателно да ги планираат активностите, особено излетите во планинските предели и патувањата по море.