Силно невреме проследено со обилни врнежи од дожд и силен ветер вечерва го зафати Стар Дојран, при што, според градоначалникот Илија Тентов, нема повредени лица, но е причинета материјална штета.
Тентов информира дека веднаш по невремето на терен излегле екипите на ДППД Дојран, доброволци и екипи на ЕВН, кои започнале со расчистување на паднатите дрвја и санирање на последиците.
„Екипите ќе останат на терен цела ноќ, сè до целосно расчистување на штетите. Ги охрабрувам граѓаните да останат спокојни, а во текот на утрешниот ден ќе се нормализира функционирањето на градот“, порача градоначалникот.
Тој ги повика жителите да пријават непроодни улици, поплавени куќи и подруми, со цел надлежните служби да можат брзо и соодветно да интервенираат.
