Водата во Дојранското Езеро е со одличен квалитет и е безбедна за капење и рекреација, покажуваат резултатите од последните анализи, соопшти Општина Дојран.
Испитувањата биле извршени на три мерни места – „Градска плажа“, плажата „Гранико“ и плажата „Полин“, а примероците биле земени во втората половина на јули.
Од Општината информираат дека, согласно Правилникот за начинот и мерките на управување со водите за капење и Уредбата за класификација на водите, анализираните мостри според микробиолошките индикатори се оценети како одлични.
Во извештајот на Центарот за јавно здравје – Велес се наведува дека водата на сите три мерни места ги исполнува микробиолошките стандарди за капење. Се посочува дека иако кај одредени физичко-хемиски параметри се забележани отстапувања од втората класа, тие не претставуваат штетно влијание врз здравјето на луѓето.
