Последната желба на писателката и колумнистка Ведрана Рудан ќе биде испочитувана – нејзиниот последен испраќај ќе биде организиран во најтесен семеен круг, а времето и местото на погребот нема да бидат јавно објавени, пренесува „Слободна Далмација“.
Рудан почина на 77-годишна возраст по долго и тешко боледување. Нејзиното семејство одлучило да ја почитува нејзината желба за приватност, поради што јавноста нема да биде информирана кога и каде ќе се одржи погребот.
На официјалната страница на Рудан на Фејсбук вчера беше објавена кратка порака: „Ведрана отиде на подрачје без сигнал“.
Пораката се поврзува со нејзиното гостување во емисијата „Неделом у 2“ во март, каде што зборуваше за својата борба со болеста. Тогаш Рудан порача дека има многу луѓе кои ја сакаат и кои таа ги сака, додавајќи дека нејзината смрт треба да се сфати како „одење на подрачје без сигнал“.
Во текот на болеста, најголема поддршка ѝ биле сопругот, адвокатот Љубиша Драгелјевиќ, како и нејзините деца, ќерката Асја и синот Славен.
Веста за нејзината смрт предизвика бројни реакции низ регионот. Од познатата писателка и новинарка се простуваат читатели, колеги, пријатели и голем број јавни личности.
