Изградбата на автопатот од Коридорот 8 до граничниот премин Ќафасан ќе продолжи, а во тек се разговори за избор на најсоодветната траса, изјави министерот за транспорт и врски Александар Николоски.
Тој посочи дека изградбата на автопатот повеќе не е прашање, туку дека останува да се усогласи трасата, при што Македонија веќе има презентирано неколку можности пред Албанија.
„За Коридорот 8 пораката е јасна – да се најде друга алтернатива или, врз основа на алтернативната траса, да се најде друга алтернативна траса од онаа што била предвидена како алтернатива во договорот. Истата да се разговара со Албанија за и тие да можат да се поврзат и на тој начин да се изгради. Ние за овој проблем интензивно комуницираме со Албанија и имаме презентирано неколку опции. Автопатот ќе се гради. Прашањето веќе не е дали ќе се гради, туку само да се најде соодветната траса“, изјави Николоски.
Во однос на автопатот Кичево–Охрид, министерот оцени дека најтешкиот дел од трасата е речиси завршен. Делницата од селото Извор до Врбјани се очекува да биде пуштена во употреба во октомври, додека преостанува да се заврши делот кај Ботун.
„Две галерии се целосно завршени. Третата е 70 отсто завршена, четвртата е на 50 отсто динамика, во Ботун се работи на тунелите, се поставува софтверот, сигнализацијата, системот за вентилација, системот за пожари и модерен контролен центар кој се поставува за зголемување на безбедноста. Очекуваме на почетокот на октомври овој најтежок дел од автопатот Кичево–Охрид да биде ставен во функција“, рече Николоски.
Според најавите, целосното завршување и ставање во функција на автопатот Кичево–Охрид се очекува во првиот квартал од 2027 година.
Во меѓувреме, првите километри од автопатот Тетово–Гостивар се очекува да бидат завршени во текот на следната година, додека целата делница треба да биде готова до 2029 година.
Во истиот рок е планирано да заврши и делницата од Гостивар до Букојчани. За делот од Букојчани до Кичево, пак, се очекува да биде донесена одлука за продолжување на изградбата.
