Николоски: Изградбата на автопатите насекаде се одвива со силна динамика

Македонија за првпат гради шест автопати истовремено, а работите на сите делници се одвиваат со добра динамика, истакна вицепремиерот и министер за транспорт Александар Николоски во гостувањето во емисијата „Само интервју“ на ТВ Канал 5. Тој се осврна на напредокот на најголемите инфраструктурни проекти во земјава и ги посочи очекуваните рокови за нивно завршување.

Говорејќи за автопатската делница Кичево–Букојчани, чија изградба започна пред неколку дена, Николоски рече дека станува збор за технички сложен, но не премногу долг потег. Како гаранција дека работите ќе завршат во предвидениот рок, изведувачите доставиле високи банкарски гаранции.

— реклама —

„Во однос на Кичево–Букојчани, има многу сериозни банкарски гаранции од изведувачите за изградба на автопатот во предвидениот рок. Се работи за тешка делница, но не е долга. Оставаме четири години и убеден сум дека овој рок ќе биде испочитуван“, изјави Николоски.

Тој се осврна и на автопатските делници што ги гради конзорциумот „Бехтел и Енка“, посочувајќи дека работите се одвиваат според планираната динамика.

— реклама —

За делницата Тетово–Гостивар, министерот рече дека трасата веќе е пробиена, додека на потегот Гостивар–Букојчани се изградени големи мостови. Николоски најави дека наскоро очекува да биде претставен и најголемиот мост како завршен.

Според најавите на вицепремиерот, изградбата на автопатите Тетово–Гостивар и Гостивар–Букојчани треба да заврши во 2029 година.

— реклама —

Позитивна динамика, како што посочи, има и на автопатот Прилеп–Битола, чија вкупна должина ќе изнесува 40 километри. Првото пуштање во употреба на дел од трасата, во должина од околу 12 километри, се очекува во средината на следната година, а во втората половина на годината е предвидено да биде отворен и дополнителен дел. Целосното завршување на автопатот е планирано за 2028 година.

Во врска со планираниот автопат од Струга до Ќафасан, Николоски откри дека се разгледува можноста за алтернативна траса, имајќи ги предвид ставовите на УНЕСКО за овој регион. Целта е да се најде решение што ќе биде прифатливо во однос на овие забелешки.

Автопатот Скопје–Блаце, пак, според најавите на министерот, се очекува да биде завршен до 2030 година.

Николоски нагласи дека изградбата на автопатите низ земјава се одвива со засилена динамика, додавајќи дека Македонија за првпат реализира шест автопатски проекти истовремено.