Николоски очекува Србија да продолжи со железничките проекти: Коридорот 10 е стратешки интерес

Промената на власта во Србија не би требало да влијае врз реализацијата на инфраструктурните проекти меѓу Македонија и Србија, особено во железничкиот сообраќај, смета вицепремиерот и министер за транспорт Александар Николоски.

— реклама —

На заедничката прес-конференција со црногорскиот вицепремиер Филип Ивановиќ, Николоски истакна дека станува збор за стратешки проекти кои ги надминуваат мандатите на владите и се од интерес за целиот регион.

Како приоритет го посочи Коридорот 10, каде што е планирана изградба на заеднички железнички граничен премин на Табановце, како и брза железничка пруга. За граничниот премин веќе е обезбеден грант од Европската Унија, а за изведувач е избрана македонската компанија „Гранит“.

— реклама —

Николоски очекува работите да се одвиваат според договорената динамика и преминот да биде завршен до крајот на следната година, по што ќе биде ставен во функција. Тој нагласи дека заедничкиот премин ќе овозможи побрз транзит, особено на товарниот железнички сообраќај.

— реклама —

Според него, Србија има интерес да продолжи со развојот на Коридорот 10, бидејќи тој претставува природна врска со Егејското Море, солунското и атинското пристаниште. Како пример за продолжување на стратешките инфраструктурни проекти и покрај политичките промени, го посочи најавениот почеток на брзата железничка линија Белград – Будимпешта – Виена на 13 декември.

Црногорскиот вицепремиер Филип Ивановиќ оцени дека е рано да се зборува за првите потези на новата власт во Србија. Според него, на победниците на изборите треба да им се остави време да ги формираат институциите и владата и да ги утврдат своите политички приоритети.

Ивановиќ посочи дека Црна Гора сака да одржува добри односи со Србија и дека изградбата на автопатот од Бар до границата, кој треба да се поврзе со автопатот од српска страна кон Белград, е од интерес за двете држави.