Заменик-претседателот на Владата и министер за транспорт Александар Николоски денеска оствари работна средба со амбасадорката на Хрватска, Нивес Тигањ, на која се разговараше за економската соработка, регионалниот развој и европската интеграција на Македонија.
На средбата биле разгледани можностите за унапредување на економската и трговската соработка меѓу двете земји, како и за создавање дополнителни врски меѓу компаниите.
Во делот на инфраструктурниот развој, Николоски ја потврдил определбата на Владата за реализација на инфраструктурните проекти, со акцент на капиталните инвестиции и нивното влијание врз регионалниот развој, подобрувањето на поврзаноста и создавањето услови за економски раст.
На средбата било истакнато и значењето на поддршката од Хрватска за европскиот пат на Македонија и реформските процеси што се спроведуваат во земјата.
Двете страни изразиле подготвеност за натамошно унапредување на соработката во областите од заеднички интерес, во духот на традиционалното пријателство и партнерство меѓу Македонија и Хрватска.
