Низа полициски акции: Осум лица лишени од слобода поради дрога

Осум лица биле лишени од слобода во текот на изминатото деноноќие во повеќе одвоени случаи поврзани со недозволена трговија и поседување дрога, соопшти Министерството за внатрешни работи.

— реклама —

Во Скопје, на подрачјето на Центар, во првите минути по полноќ бил приведен 34-годишниот Р.М., кај кого била пронајдена марихуана. Претходно, на подрачјето на Карпош бил лишен од слобода и 37-годишниот Е.М., кај кого била пронајдена бела прашкаста материја.

Во КПУ Затвор Идризово бил приведен 37-годишниот Ф.А. од скопското село Грчец, вработен во установата, откако при влез во видувалната оставил кафеава прашкаста материја на рафт.

— реклама —

Во Струга бил уапсен 54-годишниот А.Н., кај кого била пронајдена опаковка со бела прашкаста материја, додека во Неготино бил приведен 17-годишник, кај кого била пронајдена цигара со зелена растителна материја.

— реклама —

Во Прилеп, пак, полицијата лишила од слобода двајца малолетници, откако при преглед кај едниот од нив била пронајдена марихуана.

На Граничниот премин Табановце, при влез во државата, бил приведен и 42-годишниот Т.Ц. од Унгарија. При контрола на неговото возило и личниот багаж биле пронајдени бела прашкаста материја и таблети.

Од МВР информираат дека по целосното документирање на случаите против сите лица ќе бидат поднесени соодветни пријави и поднесоци.