„Њујорк тајмс“: Путин наводно наредил да се „разбијат НАТО и ЕУ одвнатре“

Рускиот претседател Владимир Путин наводно им наредил на руските разузнавачки служби и војската да работат на „разбивање на НАТО и Европската Унија одвнатре“ во текот на 2026 година, објави „Њујорк тајмс“, повикувајќи се на свои извори.

— реклама —

Според весникот, инструкцијата била дадена на таен состанок во декември 2025 година. Тоа, наводно, било спротивно на јавниот тон на Путин во истиот период, кога во обраќање пред руското воено раководство ги обвини европските лидери дека „поттикнуваат хистерија“ околу заканата од Русија.

Во наводните планови на Кремљ, централно место зазема Молдавија. Западни разузнавачки претставници сметаат дека освојувањето на Украина е главен приоритет на Москва, додека воспоставувањето контрола врз Молдавија би било следната цел.

— реклама —

Иако Молдавија не е членка ниту на ЕУ ниту на НАТО, нејзината стратешка положба меѓу Украина и територијата на НАТО ја прави особено важна. Според извори цитирани од „Њујорк тајмс“, контролата врз земјата би ѝ овозможила на Русија поволна позиција за понатамошни напади кон Украина или Западот.

— реклама —

Весникот наведува и дека Путин наводно сè уште се надева дека ќе заземе делови од јужна Украина и ќе воспостави копнен коридор што би ја поврзал Русија со Молдавија.

Дополнително, „Волстрит џурнал“ на 6 август објави дека американските разузнавачки служби проценуваат оти Путин би можел да ја тестира посветеноста на НАТО кон колективната одбрана со напад врз некоја членка на Алијансата во периодот од есента 2026 до 2029 година.

— реклама —

Германскиот врховен воен командант Карстен Бројер, пак, изјави за весникот дека Русија систематски користи беспилотни летала за проучување на европската противвоздушна одбрана и за откривање на слабости што би можела да ги искористи.