Ноќеска избегната катастрофа во прилепско Бонче: Ветер како на филм го префрли огнот кон селото кое едвај го спасиле

Катастрофа била избегната во прилепското село Бонче, каде утрово околу 4 часот силен ветер ги префрлил пламените јазици кон населеното место, изјави директорот на Дирекцијата за заштита и спасување, Стојанче Ангелов.

Според него, огнот брзо се спуштил кон долот и се приближил до куќите, а ситуацијата била исклучително сериозна.

— реклама —

„Утрово околу 4 часот, ветер како на филм ги префрли пламените јазли кон селото Бонче, Прилепско, во долот. Благодарение на храбрите пожарникари, селото беше спасено, дури јас бев песимист дека ќе успееме во таа намера“, рече Ангелов.

Тој посочи дека огнената линија била долга, а теренот тежок поради ридовите и високата вегетација.

„Селото има 50-60 куќи, по ридиштата, со висока вегетација. Побарав помош и од пожарникарите во Прилеп и Кавадарци, а од Кавадарци сега се тука“, изјави Ангелов.

— реклама —

Во интервенцијата биле вклучени и доброволци од Битола, од кои дел, според Ангелов, се наголтале чад.

„Ако не беа тука, огнот ќе поминеше низ селото, а ќе имавме страшна глетка. Таму живее и млада мајка со бебе, што ја видов изминативе денови“, рече директорот на ДЗС.

— реклама —

Сериозна состојба има и кај селото Палиград во Општина Студеничани, каде огнот исто така се приближил до населеното место.

„Таму има тим од професионални пожарникари кои дежураа. Таму дејствуваат ер-тракторите. Тој пожар, кој е на планината Китка, неколкупати е гаснет“, изјави Ангелов.

Тој информира дека вчера во државата биле регистрирани повеќе од 30 пожари на отворен простор, а дел од нив загрозувале и населени места.

Активни пожари има и во реонот над Маврово и Кичево.

„Оваа ноќ катастрофата беше избегната над село Бонче“, порача Ангелов.