Управата на ООУ „Гоце Делчев“ во Виница соопшти дека спортските игралишта во училиштето биле мета на вандализам, а сторителите се малолетни лица кои, како што наведуваат, се јасно снимени од системот за видеонадзор.
Од училиштето информираат дека е формирана комисија која ќе ја процени причинетата штета, по што случајот ќе биде процесуиран.
„Сторителите се комплетно и јасно снимени од сите агли на видео надзорот. Доколку се утврди штета, сите видео материјали и докази ќе бидат предадени во полицијата, а снимките ќе бидат јавно објавени на нашата Фејсбук-страница“, соопштуваат од училиштето.
Воедно, најавуваат дека од родителите на малолетните лица ќе биде побарано целосно да ги подмират трошоците за поправка и санација на штетата.
Од училиштето упатија апел до родителите да обрнат поголемо внимание на однесувањето на своите деца, нагласувајќи дека спортските игралишта се изградени за спорт, рекреација и дружење, а не за уништување.
„Нема да дозволиме неодговорни поединци да го уништуваат она што се гради со мака и труд за доброто на сите“, порачуваат од управата на ООУ „Гоце Делчев“ во Виница.
