Министерството за култура и туризам продолжува со инвестициите во културната инфраструктура и заштитата на културното наследство во Битола, со цел градот дополнително да го зацврсти својот статус на еден од најзначајните културни центри во државата.
Министерот за култура и туризам Зоран Љутков денеска престојуваше во работна посета на Битола, каде заедно со градоначалникот Тони Коњановски изврши увид во повеќе капитални проекти од областа на културата и културното наследство.
Посетата започна со работна средба во Општина Битола, на која беа разгледани тековните и идните проекти што се реализираат во соработка меѓу Министерството и локалната самоуправа. Во фокусот биле инвестициите во културната инфраструктура, заштитата на културното наследство и развојот на културниот туризам.
Во рамките на посетата, Љутков изврши увид во градежните активности за реконструкција, санација и адаптација на објектот на поранешното кино „Партизан“, проект вреден 94 милиони денари.
„Кино „Партизан“ со години беше запуштен и нефункционален објект. Денес гледаме дека работите се одвиваат со добра динамика и дека чекор по чекор создаваме современ, мултифункционален културен центар кој ќе биде дом на бројни културни настани и ново место за средба на уметниците и граѓаните“, изјави министерот Љутков.
Тој посочи дека објектот треба целосно да биде обновен и ставен во функција до 2027 година, кога Битола ќе добие нов простор за концерти, изложби, кино-проекции и други културни содржини.
Министерот изврши увид и во конзерваторско-реставраторските работи во Јени џамија, за чија реализација Министерството обезбедило околу 12 милиони денари.
„Нашата обврска е да ги зачуваме највредните сведоштва на нашата историја. Јени џамија е дел од културниот идентитет на Битола и затоа вложуваме сериозни средства за нејзина целосна заштита и реставрација“, нагласи Љутков.
Работната посета продолжила и на археолошкиот локалитет „Хераклеја Линкестис“, каде годинава се издвоени 700 илјади денари за заштита на локалитетот и мозаиците.
„Хераклеја не е само дел од нашето минато, туку и значаен потенцијал за иднината. Фактот што локалитетот го посетуваат до 25 илјади посетители годишно покажува колкав е интересот за нашето културно наследство. Затоа продолжуваме да инвестираме во негова заштита и презентација“, рече министерот.
Во изминатите две години, Министерството за култура и туризам инвестирало околу 32 милиони денари во проекти што ги реализира НУ „Завод и Музеј“ – Битола, меѓу кои реставрација на фасадата на музејот, партерно уредување на лапидариумот, обновување на сувенирницата и конзервација на спомен-куќите на Гоце Делчев и Стив Наумов.
Од Министерството посочуваат дека преку инвестиции во културната инфраструктура, заштитата на наследството и развојот на културниот туризам ќе продолжат да создаваат услови за зачувување и промоција на македонските културни вредности.
