Нов модел за студентскиот оброк: 4.500 денари месечно и плаќање преку „м.Услуги“, Владата чека одговор од студентите

Зголемување на студентскиот оброк на 4.500 денари месечно и воведување нов дигитален начин за користење на средствата се дел од предлозите што Владата им ги презентирала на студентските организации. За овие измени, како и за полагањето на правосудниот испит на мајчин јазик, разговарале премиерот Христијан Мицкоски и студентските претставници.

— реклама —

Мицкоски информираше дека средбата траела околу два часа и поминала во конструктивна атмосфера. Според него, студентите го оцениле предложениот модел како подобро решение од актуелниот, но Владата сè уште го очекува нивниот официјален став.

Предлогот предвидува субвенцијата за студентски оброк да се зголеми од 3.500 на 4.500 денари месечно. Средствата, наместо досегашниот начин на користење, би биле достапни преку посебна дигитална услуга во апликацијата „м.Услуги“, со која студентите би можеле да купуваат храна во ресторани, маркети, млечни ресторани и други угостителски објекти.

— реклама —

Владата планира и разговори со трговците за обезбедување дополнителни попусти за студентите, кои би важеле и по искористувањето на месечната субвенција. Дигиталниот систем, според најавите, ќе овозможи контрола средствата да се трошат исклучиво за купување храна.

— реклама —

„Ние им го објаснивме предлогот што го има Владата и цениме дека тој предлог е многу подобро решение од тоа што сега го имаат, со што и тие се согласија. Сега чекаме повратен одговор“, изјави Мицкоски.

На средбата било разговарано и за можноста правосудниот испит да се полага на јазикот на кој кандидатите го завршиле високото образование. Премиерот соопшти дека Владата подготвила предлог-решение кое треба да биде доставено до Венецијанската комисија.

Според Мицкоски, целта е истовремено да се овозможи остварување на правото на користење на мајчиниот јазик и да се почитува принципот на владеење на правото. Тој посочи дека во мислењето на Венецијанската комисија за Законот за употреба на јазиците е споменат и принципот „франка лингва“, односно употребата на еден јазик во правосудството.