Зголемената неизвесност околу снабдувањето со сурова нафта повторно ги поттикна цените на светските пазари, кои денеска пораснаа за повеќе од два проценти и го достигнаа највисокото ниво во последните повеќе од еден месец.
Според податоците на Trading Economics, северноморската нафта брент се тргуваше по цена од околу 91,2 долари за барел, додека американската сурова нафта WTI се движеше околу 84,5 долари за барел.
Инвеститорите и натаму внимателно ги следат случувањата поврзани со конфликтот меѓу САД и Иран. Воените операции на Вашингтон продолжија десетти ден по ред, а американскиот претседател Доналд Трамп порача дека Техеран ќе „плати“ за нападите во кои животот го загубија американски војници.
Дополнителен притисок врз пазарот создадоа информациите дека уште еден танкер со нафтени деривати бил погоден во близина на Ормускиот теснец, еден од најзначајните светски поморски коридори за транспорт на нафта. Во исто време, јеменските Хути се заканија дека ќе го попречат саудискиот поморски превоз во Црвеното Море, по што најмалку еден саудиски танкер со сурова нафта ја променил својата рута.
Саудиска Арабија соопшти дека ќе преземе сите неопходни мерки во согласност со меѓународното право за да ги заштити своите трговски бродови и да обезбеди непречено одвивање на поморскиот сообраќај.
Загриженоста за глобалното снабдување дополнително се зголеми и по нападот врз терминалот на Конзорциумот на Каспискиот гасовод на рускиот брег на Црното Море, поради кој привремено беше запрен извозот на нафта од Казахстан, еден од најголемите светски производители на сурова нафта.
