Нов случај на западнонилска треска во Арачиново, бројот на заразени достигна 34

Бројот на потврдени случаи на западнонилска треска во Македонија се зголеми на 34, откако се регистрирани уште три нови случаи, соопшти Центарот за јавно здравје.

— реклама —

За првпат оваа сезона вирусот е детектиран и кај жител на Арачиново, каде што, според епидемиологот Љуљзиме Бајрами, постојат услови за размножување на комарците поради канали, базени и застојани води.

— реклама —

Најголем број случаи досега се регистрирани во општините Кисела Вода и Аеродром, а речиси половина од вкупниот број се поврзани со населбата Драчево.

— реклама —

„Нов случај денеска имаме во Арачиново, првпат таму е детектиран случај. Има канали, базени, застојани води и можеби тоа е причината. Постојат услови за размножување на комарците“, изјави Бајрами.

Таа посочи дека наредната година треба порано да започне дезинсекцијата, како и да се направи анализа за евентуална отпорност на комарците на средствата што се користат, за навреме да се променат доколку тоа е потребно.