Нов спортски под, осветлување и греење – спортската сала во кавадаречката гимназија добива нов изглед

Реконструкцијата на спортската сала во СОУ Гимназија „Добри Даскалов“ во Кавадарци влегува во завршна фаза, информираше градоначалникот Митко Јанчев. За обновата на спортскиот објект Општина Кавадарци инвестира 4,2 милиони денари.

Според Јанчев, градежните активности се одвиваат согласно предвидената динамика, а со реконструкцијата салата добива современ и функционален изглед, со подобрени услови за одржување на наставата по физичко образование и спортските активности.

— реклама —

Проектот опфаќа поставување нов спортски под, уредување на ѕидните површини и модернизација на осветлувањето. Предвидено е и подобрување на системите за греење и вентилација, како и на противпожарната заштита.

— реклама —

— реклама —

Со овие зафати, како што посочува градоначалникот, треба да се обезбедат побезбедни и поудобни услови за учениците и за користење на спортскиот простор.

„Со инвестиција од 4.200.000 денари, Општина Кавадарци продолжува да вложува во подобрување на училишната и спортската инфраструктура, ставајќи ги потребите на учениците во преден план“, соопшти Јанчев.

Тој оценува дека реконструкцијата претставува уште еден чекор кон подобрување на училишната средина и создавање повеќе можности за спорт и физичка активност кај младите.