Нов закон за здравје на животните: Задолжителна регистрација, идентификација и евиденција на движењето, предвидени казни до 6.000 евра

Задолжителна регистрација и идентификација на животните, евиденција на нивното движење и построги мерки за спречување заразни болести се дел од новините предвидени со Предлог-законот за здравје на животните. Со законското решение се зголемуваат и обврските на одгледувачите, ветеринарните друштва и операторите кои работат со животни.

Една од главните промени е воведувањето систем што ќе се насочи кон спречување на болестите, наместо реакција откако ќе се појави зараза. Предвидени се редовен надзор, навремено пријавување сомнителни случаи и побрзо преземање мерки за ограничување на ширењето на болестите.

— реклама —

Сите животни ќе треба да бидат идентификувани и евидентирани во електронска база, во која ќе се внесуваат податоци за нивното потекло, раѓање, угинување и преместување. При движење ќе мора да поседуваат соодветна документација, а во одредени случаи и здравствен сертификат од официјален ветеринар. Посебни дозволи и претходни известувања ќе бидат потребни за преместување животни од подрачја во кои има ограничувања поради заразни болести.

— реклама —

Законот опфаќа и диви животни, аквакултура и производи од животинско потекло, а предвидува задолжителни мерки за биосигурност во одгледувалиштата. Дополнителни обврски ќе имаат и лабораториите што ракуваат со причинители на болести за истражување, дијагностика или производство на вакцини.

За непочитување на правилата се предвидени парични казни. За правните лица глобите се движат од 300 до 6.000 евра во денарска противвредност, зависно од големината на компанијата. За одговорните лица се предвидени казни од 200 до 450 евра, додека физичките лица може да бидат казнети со 200 евра.

— реклама —

Санкции ќе следуваат за непријавување заразни болести, недостиг или неажурирање на евиденцијата, неидентификувани животни, движење без потребни документи и дозволи, како и за непочитување на биосигурносните мерки.

— реклама —

Предлог-законот предвидува и можност за плаќање половина од глобата доколку сторителот ја подмири во рок од осум дена од приемот на прекршочниот платен налог.

Новото законско решение е усогласено со европската регулатива и треба да ги обедини правилата што досега беа опфатени со повеќе закони. За неговото спроведување ќе биде надлежна Агенцијата за храна и ветеринарство, а подзаконските акти треба да се донесат во рок од 24 месеци од стапувањето на законот во сила.