Нов застој во мировните преговори: Иран не сака средба со САД

Нови пречки се појавија во обидите за продолжување на мировните разговори меѓу Иран и САД, откако Техеран соопшти дека нема да одржи директна средба со американските претставници кои пристигнаа во Доха.

Иранските власти порачаа дека двете страни најпрво треба да ги усогласат условите поврзани со прекинот на огнот, постигнат пред две недели, пред да се отворат посложените прашања, меѓу кои и можните ограничувања на иранската нуклеарна програма.

— реклама —

Според информациите, меѓу Вашингтон и Техеран сè уште постојат сериозни несогласувања околу клучните елементи од предложената рамка за мировен договор. Планот предвидува Иран да ги повлече ограничувањата во Ормускиот Теснец во замена за економски стимулации, како и 60-дневен период за преговори за трајно решение.

Во Доха пристигнаа специјалниот американски претставник Стив Виткоф и Џаред Кушнер, зет на американскиот претседател Доналд Трамп, со намера да учествуваат во разговори на високо ниво. Сепак, иранските власти и домаќинот Катар соопштија дека засега ќе се водат само индиректни разговори преку посредници.

— реклама —

Катар потврди дека премиерот, шеикот Мохамед бин Абдулрахман ал-Тани, веќе се сретнал со американската делегација, додека портпаролот на иранското Министерство за надворешни работи, Есмаил Багаеи, изјави дека во наредните денови не е планирана никаква директна средба со американската страна.

— реклама —

Во меѓувреме, американските медиуми објавија дека претседателот Доналд Трамп разговарал со министерот за одбрана Пит Хегсет и со началникот на Здружениот генералштаб, генерал Ден Кејн, за можноста за нови воени акции против Иран. Според извештаите, засега американскиот претседател решил да ѝ даде предност на дипломатијата, иако претходно јавно предупреди дека се можни нови напади.

Во фокусот останува и Ормускиот Теснец, преку кој поминува значителен дел од светскиот извоз на нафта и течен природен гас. Иранските власти порачаа дека заедно со Оман имаат право да го регулираат сообраќајот низ теснецот и најавија можност за воведување патарини од средината на август, по истекот на 60-дневниот период.

— реклама —

Главниот ирански преговарач Мохамед Бакер Калибаф изјави дека суверенитетот над Ормускиот Теснец им припаѓа на Иран и Оман и дека правилата за пловидба ги утврдува Техеран.

Од американска страна, потпретседателот Џ. Д. Венс порача дека Вашингтон нема да дозволи Иран да наплаќа патарини за бродовите што минуваат низ меѓународниот воден пат. Тој додаде дека сообраќајот на нафта низ Ормускиот Теснец веќе се вратил на нивото од пред конфликтот, а во одредени денови дури и го надминал.