Украинските вооружени сили во текот на ноќта извршиле напад врз рафинерија за нафта во Саратовската област, како и врз неколку други објекти поврзани со руската нафтена индустрија, соопшти Генералштабот на Украина.
Според украинските власти, во рафинеријата во Саратов избувнал голем пожар. Станува збор за еден од најзначајните индустриски капацитети во регионот, кој работи во состав на руската нафтена компанија „Росњефт“.
Гувернерот на Саратовската област, Роман Бусаргин, претходно ги предупредил жителите за можен напад со беспилотни летала и информирал дека бил активиран системот за противвоздушна одбрана. Подоцна соопштил дека е оштетен објект од цивилната инфраструктура, но не прецизирал за кој објект станува збор. Според него, нема повредени лица.
Руското Министерство за одбрана соопшти дека во текот на ноќта биле пресретнати 216 украински дронови над десет руски региони, како и над окупираниот Крим и Азовското Море.
Освен Саратов, украинските сили соопштија дека била погодена и производно-диспечерската станица „Лазарево“ во Кировската област, преку која минува магистралниот нафтовод Сургут–Горки–Полоцк, како и складиште за гориво и мазива во местото Матвеев Курган во Ростовската област. Размерите на штетата сè уште се утврдуваат.
Рафинеријата во Саратов има капацитет за преработка на околу седум милиони тони сурова нафта годишно и произведува бензин, дизел и други нафтени деривати. Според украинските власти, дел од производството се користи за потребите на руската војска и нејзината логистика.
Ова не е прв напад врз овој објект. Рафинеријата беше погодена и во март годинава, кога по напад со дронови привремено беше запрено производството.
Украина во последните месеци сè почесто изведува напади длабоко на руска територија, при што главни цели се нафтената инфраструктура, воената логистика и одбранбената индустрија. Според податоци на медиумот „Вот Так“, од почетокот на војната досега се регистрирани најмалку 159 украински напади врз руски рафинерии за нафта.
