Иранската влада жестоко ги осуди американските напади врз ирански комерцијални бродови, оценувајќи дека станува збор за „воено злосторство“, додека иранските власти предупредија дека ќе следува уште посилен одговор доколку Вашингтон продолжи со поморската блокада.
Иранското Министерство за надворешни работи соопшти дека нападите врз иранските комерцијални бродови претставуваат продолжение на, како што го нарекува Техеран, американската воена агресија и поширока поморска блокада и економска војна против Иран.
Од Техеран тврдат дека со нападите САД ја прекршуваат Повелбата на Обединетите нации и претставуваат закана за меѓународниот мир, безбедноста и слободата на трговската пловидба.
Претходно вчера бил нападнат ирански танкер во близина на островот Харг, при што избувнал пожар. Потоа американската војска гаѓала уште два ирански танкери во близина на јужниот ирански град Јаск.
Иранскиот Генералштаб на здружените вооружени сили предупреди дека доколку САД продолжат со поморската блокада и, како што наведуваат, „малтретирањето на иранските бродови“, Иран ќе изврши уште посилни одмазднички напади. Од Техеран не ја исклучуваат ниту можноста нападите да бидат проширени и врз американски воени бродови.
Од друга страна, американскиот секретар за одбрана Пит Хегсет порача дека Вашингтон ќе одговори со уништување на иранските нафтени танкери доколку Иран нападне американски бродови.
„Едноставно е – ако Иран пука врз американски бродови, ќе ги уништиме и потопиме нивните нафтени танкери“, изјави Хегсет, додавајќи дека Иран, според него, нема соодветни поморски и воздушни капацитети за спротивставување на американската морнарица.
Размената на закани дополнително ги зголемува тензиите меѓу Вашингтон и Техеран и отвора ризик од натамошна ескалација во регионот.
