Нова ескалација во Ормускиот теснец: Иран наводно лансирал дронови кон трговски бродови

Само неколку дена по оптимистичките најави за можен договор меѓу Вашингтон и Техеран, безбедносната состојба во Ормускиот теснец повторно се влошува, откако американски медиуми објавија дека Иран во текот на ноќта лансирал беспилотни летала кон трговски бродови што пловеле низ стратешкиот поморски премин.

— реклама —

Според „Фокс њуз“, американските сили пресретнале и собориле два ирански дрона-самоубијци. Висок претставник на американскиот одбранбен систем изјавил дека постојат индиции оти Иран се обидел да нападне трговски бродови кои минувале низ Ормускиот теснец.

„Американските сили соборија два ирански еднонасочни нападни дрона. Сообраќајот низ теснецот и понатаму се одвива“, изјавил претставникот.

— реклама —

Во исто време, иранските државни медиуми објавија информации за експлозии во близина на крајбрежниот град Сирик, на југот на Иран. Според нив, станувало збор за инцидент поврзан со брод кој наводно ги прекршил ограничувањата за пловидба.

— реклама —

Државната телевизија ИРИБ соопшти дека се работи за танкер кој, по предупредување од морнарицата на Иранската револуционерна гарда, бил принуден да ги почитува забраните за премин.

Најновите случувања покажуваат дека, и покрај дипломатските сигнали за можна деескалација, тензиите во регионот остануваат високи. Ормускиот теснец и натаму е една од најчувствителните точки во глобалниот поморски сообраќај, преку која минува значителен дел од светската трговија со нафта.

— реклама —

Во изминатите недели, САД и Иран изнесуваат спротивставени ставови за режимот на пловидба во теснецот. Додека Техеран настојува да воведе ограничувања и надоместоци за премин, Вашингтон се залага за целосно и непречено отворање на овој клучен поморски коридор за меѓународниот сообраќај.